"A violencia política do BNG proba o acerto do pacto pola lingua co PSdeG", di o conselleiro de Educación
"A violencia política do BNG proba o acerto do pacto pola lingua co PSdeG", di o conselleiro de Educación
Román Rodríguez cualificou o acordo como unha "aposta polo equilibrio lingüístico e a igualdade de competencias entre as nosas linguas"
López Campos: "Precisamos unha ferramenta para o galego que se adapte aos novos tempos"
O conselleiro de Educación dixo este venres que a “violencia política coa que arremeteu o Bloque Nacionalista Galego” contra o acordo pola lingua que selaron o Partido Popular e o PSdeG é “o mellor indicador de que acertamos”.
“Toda a estutura do non, aposta pola inmersión lingüística, e creo que o que se asinou este xoves aposta polo equilibrio lingüístico e a igualdade de competencias entre as nosas linguas”, declarou o conselleiro de Educación.
“Aposta pola estabilidade, algo que é tremendamente importante, e aposta polo futuro”, engadiu.
“Creo que a violencia política con arremeteuna o Bloque Nacionalista Galego contra este acordo é o mellor indicador de que acertamos. O mellor indicador de que acertamos é a reacción tan violenta do BNG. É unha violencia radical”, concluíu.
A voceira nacional do BNG, Ana Pontón, cargara este venres contra o pacto entre o PP e o PSOE para a actualización do plan xeral de normalización da lingua galega co que os socialistas van "branquear a política lingüicida" da Xunta a cambio de "cargos institucionais".
Pontón compareceu este venres para dar conta dun pacto que "mantén punto por punto" o mesmo "decreto da vergoña", dixo en referencia ao decreto do plurilingüismo, en vigor desde 2010.
A vicevoceira do PSdeG no Parlamento, Lara Méndez, sinalara que a situación do idioma é "de emerxencia", e por iso os socialistas deron o paso para pactar o acordo pola lingua co PPdeG. Méndez asegurou que ese acordo recolle avances, "pero nós seriamos máis ambiciosos".
