700 pequenos falaron con Papá Noel desde a rede de aulas CeMIT
Atendeunos desde Laponia nunha divertida videoconferencia
A rapazada fixo peticións de última hora antes de Noiteboa
Desde a nevada Laponia ata Boiro en rigoroso directo con Papá Noel. Unha ocasión única que a cativada aproveitou para facer peticións de última hora.
A ilusión puido máis ca os nervios e todos manifestaron os seus desexos neste encontro virtual, celebrado na rede de aulas para a modernización e a inclusión tecnolóxica, CeMIT.
"É un primeiro contacto coa tecnoloxía desde as aulas CeMIT que ten a Xunta en 96 concellos galegos", explica Miguel Corgos, conselleiro de Facenda.
"En concellos coma o noso é importante ter este tipo de aulas, para a xente moza pero tamén para os maiores, agora que case todos os trámites burocráticos se fan a través da tecnoloxía", engade José Ramón Romero, alcalde de Boiro.
Tecnoloxía que permitiu á rapazada agasallar a Papá Noel cunha tímida panxoliña de despedida ata o día de Nadal.
