"Albaceas dixitais" para xestionar legados na rede; a lei galega de dereito civil buscará adaptarse ao contorno tecnolóxico

O conselleiro de Xustiza, Diego Calvo, presentou este mércores as conclusións do estudo levado a cabo para renovar a lei galega de dereito civil e reformar, entre outros puntos, a regulación existente sobre aspectos como o patrimonio dixital, as parellas de feito ou as sucesións.

Calvo compareceu en conferencia de prensa xunto a integrantes do Colexio Notarial de Galicia, a quen lle encargou esta proposta que expón a actualización de ata douscentos artigos da norma vixente.

O decano deste colexio, José María Graíño, advertiu de que o exposto non se trata dun "texto pechado", senón dun documento inicial para esta renovación que, segundo precisou Calvo, será sometido a consulta con outras entidades antes de ser aprobado no Consello da Xunta e iniciar a súa tramitación parlamentaria.

Graíño puntualizou que a norma require dunha "revisión profunda" para adaptarse ás "peculiaridades" e "inquietudes" da sociedade galega actual e por ese motivo propuxeron incidir nos asuntos que detectan como prioritarios en notaríalas da comunidade.

Deste xeito, incídese sobre as regulacións que rexen as parellas de feito, figura legal en auxe. Entre as modificacións figura que os membros da parella poidan pactar as súas relacións económicas, o recoñecemento expreso do traballo no fogar e, en caso de falecemento, o recoñecemento dos mesmos dereitos que a lei atribúe aos cónxuxes viúvos.

Entre as modificacións suxeridas figura o do reforzo do contrato de vitalicio, para que as persoas que entregan parte do seu patrimonio a cambio de recibir alimentos, asistencia e coidados durante toda a súa vida teñan a seguridade de que ese compromiso vai cumprir. Búscase tamén que estas relacións estean mellor cuantificadas e definidas desde o principio, alén de reforzar as posibilidades de reacción ante un incumprimento permitindo a resolución do contrato.

Dereito sucesorio

O conselleiro explicou que os principais cambios propostos céntranse no dereito de sucesións, coa reforma de case 200 artigos da actual norma.

Neste campo mantéñense instrumentos fundamentais como o testamento, os pactos sucesorios e a propia lei, reforzando a capacidade das persoas para organizar en vida como queren que se distribúa o seu patrimonio e asentando a autonomía da vontade no proceso sucesorio. Ademais, adáptase a lei galega á normativa de apoio ás persoas con discapacidade e ao dereito europeo.

Nun contexto no que en Galicia son múltiples as renuncias ás herdanzas, entre as novidades destaca tamén a limitación da responsabilidade dos herdeiros aos bens da herdanza, de xeito que se compatibiliza a suficiente protección dos acredores coa das persoas herdeiras. Deste xeito, os herdeiros só responderán das débedas do falecido cos bens que reciban. Ademais, inclúese a posibilidade de renuncia da lexítima en vida.

Diego Calvo incidiu en que a proposta de actualización realizada a pedimento da Xunta ten como obxectivos primordiais que o dereito civil galego siga sendo capaz de protexer a maiores e persoas con discapacidade, que dea seguridade xurídica ás novas formas de convivencia, permita organizar mellor a transmisión do patrimonio familiar e teña en conta a realidade dixital.

Preténdese, así mesmo, facilitar os procesos sucesorios, reducindo incertezas e ofrecendo instrumentos xurídicos máis claros e flexibles.

De igual xeito, a proposta introduce o concepto de "albacea dixital", que será "aquela persoa que, por encargo directo, do causante ou do testador" se encargue de xestionar os seus perfís nas redes sociais e webs, así como outros activos dixitais, conforme a vontade dos falecidos.

Diego Calvo salientou que esta reforma está pensada para aumentar a protección e a seguridade xurídica en resposta aos cambios detectados na sociedade actual cun intento de reducir as "incertezas" nestes procesos e dispoñer de instrumentos xurídicos" máis claros".