Os Reis Magos visitan varias vilas galegas un día antes por mor do mal tempo
As súas maxestades chegan a Santiago de Compostela e percorren o centro malia a presenza da choiva
Tamén visitan outras localidades como Nigrán, Oia, A Cañiza, Paderne, Cangas, Verín, Ribadavia ou Sarria
Os Reis Magos xa chegaron este sábado a Santiago e a outras localidades galegas. Un ano especial, no que as súas maxestades de Oriente terán traballo dobre para que o mal tempo non trunque o seu percorrido por Galicia.
Na capital galega, a choiva fixo acto de presenza durante todo o percorrido, pero non impediu que a comitiva real, sobre as 17:30 horas, comezase o seu percorrido desde a praza de Nosa Señora da Mercé de Conxo.
Un ano máis, acompañados de música e espectáculos, repartiron ilusión e caramelos entre a cativada até chegar á praza do Obradoiro, minutos antes das 19:00 horas.
Con todo, Santiago non foi o único municipio en adiantar a chegada das súas maxestades. De feito, tamén percorreron as rúas da Cañiza, Nigrán, Oia, Paderne, Cangas, Verín, Ribadavia ou Sarria.
Cabalgatas e recepcións do domingo
En Vigo, cancelouse o percorrido pola cidade pero haberá unha cabalgata estática no Ifevi en horario de 11:00 a 14:00 e de 17:00 a 20:00 horas. Repartiranse 4.200 quilos de caramelos sen glute e haberá animación.
Marín suspendeu a cabalgata do domingo e, no seu lugar, haberá dúas recepcións reais, unha ás 18:00 horas no concello, e outra a partir das 19:30 no Templo Novo.
En Lousame haberá recepción pola mañá o mesmo día de Reis e festival pola tarde. No caso de Ferrol, cancelouse a chegada dos Reis Magos por mar ao peirao de Curuxeiras e adiantouse o inicio da cabalgata ás 17:00 horas.
A comitiva en Ourense sairá ás 18:00 horas do Pavillón dos Remedios e percorrerá as rúas Progreso, Alameda e Praza Maior, onde haberá unha recepción real sobre as 19:30 horas.
Na Coruña, máis de 750 persoas e 16 compañías nacionais e internacionais participarán nunha cabalgata que incluirá 13 carrozas e sairá da ronda de Camilo José Cela para terminar na praza de María Pita.
O percorrido en Lugo comeza ás 18:00 horas no parque da Milagrosa e remata no concello. O desfile contará con catro carrozas e 14 espectáculos teatrais. Haberá repartición de 1.500 quilos de caramelos.
Nesta cidade, o programa manteranse con choiva moderada e de ser intensa, suspenderase e os Reis recibirán aos menores na casa consistorial.
Pontevedra organiza este domingo unha recepción no concello a Melchor, Gaspar e Baltasar e pola tarde, malia a previsión de choiva, percorrerá as rúas do centro.
Entre un e outro evento repartiranse dúas toneladas de caramelos que serán aptos para celíacos e, no caso da recepción, ademais, serán sen azucre.
As súas maxestadas en Ribadavia
Pendentes da choiva
Sexa un día ou outro, a cativada de toda Galicia terá a posibilidade de ter o seu encontro cos Reis Magos.
A recepción en Valga, o día 5, será a partir das 16:00 horas nos exteriores do Belén Artesanal. En Sanxenxo será no pavillón de Nantes e cancélase a cabalgata.
En Poio será o día 6, cunha ruta real previa o domingo e a Monforte chegan por tren ese día ás 17:30 horas.
Na Coruña, optaron por cambios no percorrido para evitar as zonas de máis vento e discorrerá pola avenida Fernández Latorre en lugar da rúa Ramón e Cajal.
Noutros municipios da provincia, como Oleiros, mantense en principio a cabalgata, igual que en Carballo onde haberá posibilidade de seguimento por streaming.
Betanzos mantén o seu tradicional percorrido pero se a situación é complicada, limitarase a unha recepción no Liceo.
