Estes son os nomes favoritos dos galegos para os neonatos da década dos 2020

Mateo, Martín, Sofía e Noa son os nomes máis elixidos polos galegos para os bebés acabados de nacer na década dos 2020, segundo a estatística de Nomes máis frecuentes dos recentemente nados publicada este mércores polo Instituto Nacional de Estatística (INE).

Así, entre os nenos, Mateo e Martín repítense no 'top 3' de todas as provincias galegas, sendo Mateo o máis elixido cuns 790 nenos no que vai de década, seguido de Martín, con case 750. De feito, Mateo é o nome de neno favorito en todas as provincias galegas menos en Pontevedra, onde ocupa o segundo posto, estando Martín no primeiro. 

No caso das nenas, ocorre unha circunstancia similar con Noa e Sofía. Este último é o elixido por uns 525 pais e nais no que vai de década en Galicia, e ocupa a primeira praza da clasificación en Ourense e na Coruña, así como o segundo lugar en Pontevedra e Lugo.

Pola súa banda, Noa é o nome favorito de nena dos pontevedreses, quedando en segunda posición en Ourense e en terceira na Coruña e Lugo. Con máis de 500 casos, queda en segunda posición a nivel galego.

Na lista de nomes femininos introduciuse o de Valeria, que é o máis elixido polos lucenses, mentres que Martina está en segunda posición na Coruña e de terceira en Pontevedra.

Galicia lidera a caída de saldo vexetativo en 2023 e os nacementos caen un 3,3 %

Galicia rexistrou 14.004 nacementos en 2023, o que supón un 3,39 % menos ca o ano anterior (491 menos), e liderou a caída do saldo vexetativo no conxunto de España en termos absolutos, con 18.778 defuncións máis que nacementos, un 16,5 % do total.

Así se desprende da enquisa do Instituto Nacional de Estatística (INE) sobre o Movemento Natural de Poboación (Matrimonios, Nacementos e Defuncións) que certifica que o número de nacementos continúa á baixa, cun 28 % menos de nacementos en Galicia o pasado ano respecto ao ano 2000.

No conxunto de España houbo 320.656 nacementos en 2023, o que supuxo un descenso do 2,6 % respecto ao ano anterior, e deles 78.330 foron de nai estranxeira, un 24,4 % do total, case un punto e medio máis que un ano antes.

Durante o ano pasado faleceron en Galicia 32.804 persoas, un descenso do 6,3 %, mentres que o conxunto de España morreron 436.124 persoas, un 6,1 % menos. A esperanza de vida en Galicia para os nados o ano pasado situouse en 83,6 anos, a novena comunidade de España, cuxa media é de 83,8 anos.

Na nosa comunidade, ademais, o número de fillos por muller non chegou nin a un (0,99); mentres que a media do país situouse en 1,12.