Sánchez pide un último esforzo aos grupos para poder validar o decreto de vivenda no Congreso

O presidente do Goberno Pedro Sánchez anuncia que levará este martes ao Consello de Ministros o decreto de vivenda con medidas urxentes ante a emerxencia habitacional para a súa aprobación e pediu un último esforzo aos grupos parlamentarios para a súa validación no Congreso.

Pedro Sánchez reclama altura de miras e sentido de Estado aos grupos parlamentarios para sacar adiante o decreto de vivenda. Fíxoo este luns pola noite en Barcelona, na clausura dos IV Premios Vangarda 2026 celebrada no Palau de Congressos de Catalunya. 

Sen detallar o alcance das medidas que este martes leva ao Consello de Ministros, o xefe do Goberno explicou: "Fixemos un grande esforzo para materializalo. Con diálogo, con capacidade de negociación, incorporando propostas e iniciativas de todas as forzas políticas que tiveron a ben sumarse a este esforzo".

O presidente pídelles tanto ás comunidades autónomas coma aos concellos que poñan da súa parte para protexer as vidas e os fogares dos españois e que o fagan non por unha cuestión ideolóxica senón por unha cuestión de humanidade.

Reivindicou que o patriotismo sirva para evitar que unha muller de 87 anos que estivo 70 pagando relixiosamente o seu alugueiro na mesma vivenda, no seu mesmo barrio, acabe na rúa despois de toda unha vida nesa casa.