Literatura e ilustración galega na Feira do Libro de Bos Aires
A feira bonaerense é un dos principais acontecementos editoriais de América
Forman a delegación galega os escritores Arantza Portabales, Malores Villanueva, Ulises Bértolo, Luís González Tosar e o ilustrador Alberto Guitián
Tamén participa na feira a editora pontevedresa Kalandraka
A delegación chega á feira do libro de Bos Aires na última semana desta 47.ª edición. Participarán nunha vintena de actividades organizadas pola Xunta para difundir a nosa cultura e edición neste evento editorial e entre a comunidade galega na Arxentina.
No recinto feiral a Xunta conta cun espazo de promoción que expón 250 novidades literarias. Kalandraka tamén participa na feira, nun posto compartido con outras editoras.
O Diario cultural da Radio Galega conversou coa narradora Arantza Portabales, que segue buscando novos camiños internacionais para as súas novelas policiais, e mais co ilustrador Alberto Guitián, que presenta en Bos Aires a segunda edición da Guía Ninja do ilustrador, un manual de defensa profesional para ilustradores.
Foto: Editorial Kalandraka
