A acusada de matar o seu home con medicamentos insiste en que foi un suicidio de mutuo acordo

"Díxome: cando eu perda as forzas, voume. Eu isto interpreteino como que se quería suicidar. E díxenlle: se te vas, eu voume contigo. Porque a vida sen ti, para min non ten sentido", declarou esta mañá a acusada de matar o seu home con medicamentos en Monfero, en xullo de 2021. 

Explicou tamén que a fin de semana anterior ao falecemento, o seu marido xa non se expresaba ben, pero que ela soubo perfectamente o que lle quería dicir.

"Díxome: eu creo que hoxe é o día de facer o que tiñamos pensado. Pregunteille se se refería ao dos medicamentos e dixo que si. Entón díxenlle que como el quixera", engade a investigada.

Relatou que o seu home foi quen inxeriu primeiro, e por si mesmo, os medicamentos e que ela agardou porque quería despedirse antes dos fillos, aos que lles deixou unha nota na que lles pedía perdón.

Antes declararon os forenses do Instituto de Medicina Legal de Galicia (IMELGA). E chegaron á conclusión de que a morta da vítima foi violenta ou homicida.

Tamén estaba citada unha neuróloga proposta pola defensa. Ela alega que, na última valoración que se fixo do home, se reflicte que tiña a linguaxe comprensiva conservada e a linguaxe expresiva danada.

O xuízo, que se celebra con xurado popular, segue mañá coas conclusións finais do Ministerio Público e a defensa.