A galega María Blanco, segunda española en ingresar na Academia de Medicina de Francia
María Blanco centra a súa investigación no desenvolvemento de nanomedicamentos para o tratamento do cancro
A investigadora María Blanco Prieto, natural da Pobra de Trives (Ourense), xa é a segunda española e que ingresa na Academia Nacional de Medicina de Francia.
Segundo informa a Universidade de Navarra, da que Blanco é catedrática e profesora na Facultade de Medicina e Nutrición, participou en París na sesión solemne de entrada de novos membros da institución, que aprobou por decreto o presidente de Francia, Emmanuel Macron.
"Esta distinción representa unha grande honra para min, pero tamén supón unha gran responsabilidade formar parte desta prestixiosa Academia, polo que me comprometo a estar á altura da confianza depositada", manifestou a galega, durante o seu discurso de ingreso nesta entidade que é asesora do Goberno francés.
María Blanco, que ademais é a primeira muller española en acceder á Academia, centra a súa investigación no desenvolvemento de nanomedicamentos para o tratamento do cancro -en particular, o infantil-, así como na rexeneración do tecido cardíaco e cerebral mediante o uso da enxeñería de tecidos. O seu labor nestas áreas foi recoñecida con numerosos premios tanto a nivel nacional como internacional.
Entre outros recoñecementos, é membro da Academia Nacional de Farmacia de Francia, da Real Academia de Farmacia de Galicia e da Academia Europea. Ademais, desde 2020 e ata marzo de 2024, foi presidenta da Sociedade Española de Farmacia Industrial e Galénica (SEFIG), e actualmente preside a Federación Europea de Ciencias Farmacéuticas (EUFEPS).
