A síndrome posvacacional aféctanos a case todos e é normal
Falar das vacacións ou pensar no próximo período de descanso axuda a adaptarse de novo á rutina
Non é un trastorno, nin unha enfermidade. A maioría das persoas teñen síndrome posvacacional cando volven ao traballo. É normal estar máis canso, ansioso ou irritado ao recuperar a rutina. Os expertos din que axuda falar das vacacións cos compañeiros ou pensar na próxima fin de semana libre.
Facer ringleiras dunha hora para un xeado, soportar unha vaga de calor nunha cidade ateigada de xente ou non atopar lugar para poñer a toalla nunha praia con milleiros de parasois, todo se atura ben mentres estamos de vacacións. Pero só pensar en volver ao traballo, e algúns xa enferman.
Isto é o que chamamos síndrome posvacacional. Os expertos din que para superala o mellor é pensar na seguinte fin de semana ou nas vindeiras vacacións. Pero a maioría opta pola resignación e a paciencia.
A síndrome non afecta a todos por igual. Algúns volven ao traballo ou ao colexio con moitas ganas.
E tamén hai quen nunca na vida tivo síndrome posvacacional porque volver ao traballo sempre lle resultou agradable.
Quizais a clave estea aquí. En buscar unha vida que nos faga felices todo o ano e non só nas vacacións.
