Air Europa cancela unha vintena de voos na fin de semana, dous en Alvedro, pola folga dos pilotos

Máis de vinte voos, en concreto 22, víronse afectados esta fin de semana pola folga que manteñen os pilotos de Air Europa desde mediados do mes de xuño.

A empresa cancelou o sábado dez conexións e este domingo serán un total de doce os avións que quedarán en terra. En Galicia tamén afectan os paros e esta xornada, á terminal de Alvedro.

Son dous os voos cancelados, o que viña de Madrid ás 10:35 da mañá e o mesmo voo, que saía da Coruña rumbo á capital contra o mediodía.

Os traballadores denuncian que a empresa incumpriu o preacordo verbal de actualización salarial, o que xa provocara paros no mes de maio. As novas xornadas de folga comezaron o 19 de xuño e van continuar ata o día 2 de xullo, unha época especialmente complicada ao coincidir coa escollida por moitos para iniciar as súas vacacións estivais. 

A compañía ofrécelles aos afectados pola folga un cambio de voo nos 30 días posteriores á data do orixinal e na mesma ruta ou elixir outra a outro destino operado por Air Europa nun prazo de tres días anteriores ou posteriores á data orixinal do voo.

Tamén poden gardar o importe do billete nun bono para usar noutro voo máis adiante.