As aseguradoras tentan cuestionar algunhas secuelas dos feridos no accidente do Alvia
Os peritos que testifican a petición do seguro do ADIF desvinculan do sinistro a orixe ou a evolución dalgunhas doenzas das vítimas
O especialista que atendeu unha ferida grave que precisou 5 operacións recalca o dano moral que supoñen as intervencións reiteradas
A sesión do xuízo do Alvia deste mércores centrouse en acreditar os dereitos de compensación da parella dunha das vítimas mortais. Ata o momento os adiantos achegados polas aseguradoras neste caso só os cobrou a familia de orixe, porque pese a levar uns dez anos de convivencia, a parella non formalizara legalmente o seu vínculo.
O outro caso visto esta mañá no Gaiás evidenciou de novo as disparidades entre os forenses de cada parte e puxo de manifesto que case dez anos despois do accidente é máis difícil precisar as valoracións derivadas daquelas "feridas de catástrofe".
A defensa da aseguradora do Adif tenta aproveitar ao seu favor o tempo transcorrido para poñer en cuestión algunhas das secuelas que sofren as vítimas.
