Atopan dous pescadores desaparecidos dende a noite do domingo en Ferrol
A súa embarcación envorcou por un golpe de mar e estes dous homes mantivéronse sobre a quilla ata que esta se afundiu e saltaron a unhas rochas
A embarcación en que ían os dous pescadores quedou coa quilla ao sol preto do cabo Prior
Dous pescadores de 23 e 36 anos foron localizados este luns tras desaparecer o domingo en Ferrol.
Segundo o 112 Galicia, os dous pescadores foron rescatados en helicóptero sobre as 13:00 horas nunhas pedras nas proximidades do cabo Prior.
O aviso da súa desaparición anunciouse na noite do domingo, cando os dous pescadores non regresaron ás súas casas tras saír a pescar a bordo dunha planadora na zona do cabo Prioriño e punta Frouxeira.
O Concello de Ferrol detalla que a embarcación, de 7 metros de eslora, envorcou por un golpe de mar. Os seus ocupantes mantivéronse sobre a quilla ata que esta se afundiu e saltaron a unhas rochas de onde os levaba a corrente.
Os equipos de intervención localizaron os dous pescadores con feridas leves nestas rochas, ás que accedeu o helicóptero para rescatalos.
Os dous rescatados son un home de 23 anos residente en Meirás, no municipio de Ferrol, e outro de 36 anos do concello de Narón.
