Berta Dávila, Antía Otero e Ledicia Costas, entre as galardoadas cos Premios Follas Novas
A autora mexicana Lydia Cacho, perseguida polo seu activismo social, foi recoñecida como Escritora Galega Universal
A gala do libro Follas Novas celebrouse esta tarde en Santiago e nela premiáronse as mellores obras en galego nas distintas disciplinas e xéneros.
Autores, editores e libreiros están detrás desta iniciativa e entre as galardoadas hoxe figuran Berta Dávila en narrativa, Antía Otero en poesía, Paula Carballeira en teatro e Ledicia Costas en literatura infantil. Tamén foron recoñecidas Eva Mejuto por partida dobre, Daniela Ferrández Pérez coa mellor achega en ensaio e as traballadoras das bibliotecas municipais da Coruña no ámbito da promoción da lectura.
Estes galardóns teñen carácter honorífico e non levan aparellada dotación económica. Nesta edición, os premios de honra foron para Edicións do Castro, a libraría compostelá Númax e a autora mexicana de orixe galega Lydia Cacho, que foi nomeada Escritora Galega Universal. Con este último recoñecemento, a Asociación de Escritores en Lingua Galega destaca cada ano aqueles autores que unen á excelencia literaria o compromiso ético.
