Catro anos de cárcere para un home que abusou sexualmente do seu sobriño de dez anos
O tribunal ditamina que é o autor de dous delitos sexuais cara ao menor
Tras a súa saída do cárcere, o home pasará un ano en liberdade vixiada
Imaxe de arquivo da Audiencia Provincial de Pontevedra/EP
A Audiencia de Pontevedra acaba de condenar un home a catro anos de prisión polo abuso sexual do seu sobriño. En 2021, cando sucederon os feitos, o menor tiña dez anos de idade.
O tribunal ditaminou que é autor de dous delitos de abusos sexual, aínda que se lle aplica a atenuante recollida no Código Penal por unha diminución das facultades intelectivas, por mor dun atraso mental leve, e volitivas.
Os maxistrados impuxéronlle tamén a prohibición de aproximarse a menos de 500 metros do menor, ademais do domicilio, centro escolar ou calquera outro lugar frecuentado por el. Tampouco poderá comunicarse con el durante seis anos. Tras a súa saída do cárcere dentro de catro anos, o home pasará un ano en liberdade vixiada.
A sentenza considera probado que o tío do menor, co que coincidiu no verán de 2021 en casa dos seus pais, realizou tocamentos á vítima e, tras espirse, abusou del. Aínda que o veredicto da Audiencia de Pontevedra non é firme, pode ser apelado no Tribunal Superior de Xustiza de Galicia.
