Detida en Tahití a tripulación dun pesqueiro vigués que levaba 524 quilos de cocaína

A Policía francesa detivo en Tahití a catorce membros da tripulación dun pesqueiro de bandeira española, todos eles de orixe suramericana, tras atopar no barco 524 quilogramos de cocaína.

A Policía gala informou este domingo nun comunicado que o apresamento do pesqueiro Raymi, que ten a súa sede no porto de Vigo, produciuse o pasado día 23 ao sur da zona económica exclusiva da Polinesia francesa, nunha operación que levou a cabo en cooperación coa Policía Federal Australiana (AFP).

Os axentes franceses que subiron a bordo do Raymi desde o Bougainville, un barco da Mariña, atoparon 11 paquetes que contiñan os 524 quilos de droga, así como uns 8.000 euros en efectivo.

O Bougainville conduciu o pesqueiro español ata o porto de Papeete, na illa de Tahití, na Polinesia francesa, onde chegou este sábado pola mañá e onde se vai levar a cabo a investigación baixo a responsabilidade da Fiscalía.

Tratarase de determinar, entre outras cousas, a orixe e o destino da cocaína. A Xendarmería non deu precisións sobre as nacionalidades dos detidos, máis aló de sinalar que son de orixe suramericana.

Unha corentena de axentes franceses foron mobilizados para esta operación.

O pesqueiro Raymi atracado no porto de Vigo. Foto: Ministerio de Agricultura Pesca e Alimentación