Estantes baleiros nos supermercados polo paro do transporte

Difícil mercar este sábado macarróns ou fideos nalgúns supermercados. Os das pastas, as fariñas e outros derivados do trigo son os estantes máis baleiros.

Nos supermercados que visitamos tampouco había aceite de xirasol, que comezou xa a escasear coa guerra de Ucraína, agora co paro do trasporte faltan tamén algunhas marcas de aceite de oliva. O leite é tamén o máis buscado, só quedan algunhas marcas.

E moita xente marchou este sábado para a casa sen o peixe que quería. Faltaba sobre todo peixe azul, xarda e xouba. E o peixe que si chegou hoxe á praza de abastos de Ourense, en moi pouca cantidade e máis caro.

Tamén están perdendo de vender este día de san Xosé as froiterías. Din que non lles chegou tomate, espárrago e outras froitas e verduras que veñen do sur de España. Tampouco atopamos algunhas carnes como polo ou coello.

Con todo, pídenlle á xente que non deixen de vir mercar que de momento, algo, vai habendo para levar. Temen que o desabastecemento aumente a partir da próxima semana.