Falece un home de 47 anos ao ser atropelado por un tren no Barco de Valdeorras

Un home de 47 anos faleceu esta madrugada ao ser atropelado por un tren no concello ourensán do Barco de Valdeorras.

Segundo informaron os servizos de emerxencias do 061, o suceso produciuse pasada a medianoite nese concello da provincia ourensá.

Ata o lugar desprazouse unha ambulancia asistencial de urxencias sanitarias de Galicia do 061 e persoal do PAC do Barco, aínda que non puideron facer nada por salvarlle a vida, pois xa falecera. A Garda Civil investiga as causas do fatídico accidente a fin de esclarecer o sucedido.