Falece un home de 74 anos no Incio cando rozaba unha leira

Un home de 74 anos veciño do Incio faleceu mentres rozaba unha leira. Ocorreu onte arredor das dúas da tarde no lugar de Castillón, situado na parroquia de Reboiro, no Incio.

O home, que era un xubilado e estaba casado, atopábase limpando unha parcela en fronte do seu domicilio cando, por causas que se descoñecen precipitouse a un camiño.

Está por determinar se sufriu unha indisposición previa ou faleceu a consecuencia do golpe ao caer.

Ata o lugar trasladáronse os sanitarios, entre eles unha ambulancia medicalizada, que a pesar de intentar reanimalo só puideron certificar a súa morte.