Interveñen 35 millóns na desarticulación dunha rede de branqueo con 20 detidos en España

A Garda Civil, en colaboración con axentes de Chipre, Alemaña e Francia, interviu máis de 27 millóns de euros en criptomonedas e outro oito millóns en efectivo a unha organización criminal dedicada a branquear a grande escala diñeiro "sucio" xerado polas actividades doutros delincuentes, dedicados fundamentalmente á falsificación de produtos importados da China.

As investigacións sobre a operación IFADE-YUZUK iniciáronse a mediados de 2023, grazas á identificación de actuacións sospeitosas no marco dos labores de prevención da Garda Civil en aeroportos españois.

Segundo destaca a Garda Civil nun comunicado, a organización desarticulada prestaba un servizo de branqueo de capitais utilizando a compensación a través de criptomonedas.

Foron necesarias dúas fases para desmantelar por completo a estrutura delituosa. Unha primeira que tivo inicio o 28 de outubro de 2024, centrada na desarticulación da organización criminal, con actuacións en España, Chipre e Francia, e unha segunda fase, iniciada o 19 de novembro de 2024, focalizada nos clientes da organización asentados en España.

De maneira global, a operación rematou cos datos seguintes: 20 detidos en España, un en Francia, dous en Eslovenia e 17 investigados; 90 rexistros en total, dos cales 77 foron realizados en España, 1 en Francia e 13 en Chipre; 36 vehículos intervidos ademais de 8,2 millóns de euros en efectivo e 27 millóns de euros en criptomonedas.

Segundo a axencia europea Europol, a rede criminal estaba formada principalmente por ucraínos que supostamente abusarían do status temporal da UE concedido a refuxiados deste país desde 2022 pola guerra iniciada por Rusia. Desta forma, conseguiron trasladar o diñeiro en efectivo declarándoo como parte do seu propio patrimonio.

Tamén hai armenios, acerbaixáns ou kazaxos entre os investigados por formar parte de "servizos de mensaxería de efectivo e banca clandestina a outras redes criminais", segundo informou Europol.

A rede servíase tamén de cidadáns chineses, encargados presuntamente do lavado de diñeiro para outros actores criminais de fala rusa e asiáticos involucrados no tráfico de drogas, a evasión fiscal ou o contrabando de bens ilícitos.

Fluxo d 3 millóns semanais en operacións con criptomonedas

O grupo realizaba unha "compra" do diñeiro en efectivo obtido de forma ilícita, compensándoo mediante transaccións en criptomonedas, a cambio dunha comisión que oscilaba entre o 2 e o 3 %.

Posteriormente ese diñeiro en efectivo era “vendido”, sendo tamén compensado en criptomonedas e mediando novas comisións en porcentaxes similares, polo que a organización conseguía manter saldo estable nas billeteras empregadas, garantindo unha cadencia de entre 4 e 6 operacións semanais, cun fluxo de 3 millóns de euros á semana.

Os investigadores constataron que nun primeiro momento o diñeiro era extraído do país en voos comerciais, clandestinamente ou amparándose o seu transporte en declaracións de movemento de medios de pago, sendo Chipre o principal destino. Despois, a organización optou polos transportes por estrada para a “venda” dese diñeiro tanto en España como en países veciños (Francia e Portugal).

A pesar de identificarse diferentes orixes ilícitas deste diñeiro, prevalece o xerado mediante o comercio de mercadoría procedente da China, identificándose delitos de fraude contra a Facenda Pública e contra a propiedade industrial.

A venda de produtos falsificados realizábase en puntos como Badalona (Barcelona) e Manises (Valencia). Aínda que, é nunha localidade de Madrid onde se sitúan a maioría de locais involucrados, en tanto que as entregas de diñeiro en efectivo constatáronse en Madrid, Barcelona, Málaga, Castelló, Valencia e Alacante, ademais de Chipre, Francia e Portugal.

A Garda Civil destacou que foi necesaria a colaboración doutros organismos externos como a Oficina Nacional de Investigación da Fraude (ONIF) da AEAT, o Servizo Executivo de Prevención de Branqueo de Capitais (SEPBLAC), a Oficina SIRENE España e a Secretaría Xeral do Tesouro, así como analistas e especialistas en criptomoneda de Europol.

A nivel internacional, o caso requiriu a coordinación e concerto das autoridades xudiciais e fiscais de España, Chipre e Alemaña que, xunto con Europol e grazas ao papel de Eurojust, propiciou a constitución dun equipo conxunto de investigación.

Grazas ao apoio prestado pola iniciativa T3 TCU, composta polas empresas Tron, Tether e TRM Labs, logrouse o bloqueo preventivo de máis de 26,4 millóns de USDT. Así mesmo, grazas á cooperación coa empresa de intercambio de criptomonedas Binance, bloqueáronse 29 contas con saldos por valor aproximado de 152.000 dólares.

A operación, dirixida polo Xulgado de Instrución número dous do Prat de Llobregat (Barcelona), foi desenvolvida conxuntamente por parte da Unidade Central Operativa (UCO) e Unidades do Servizo de Información da Garda Civil.