Maggie O'Farrell, Alejandro Zambra e o galego Antón Riveiro, gañadores do XXVIII Premio San Clemente de novela

Maggie O'Farrell, en lingua estranxeira, Alejandro Zambra, en lingua castelá, e Antón Riveiro, en novela en galego, foron os escritores galardoados este ano no XXVIII Premio literario Arcebispo Juan de San Clemente.

'Retrato de casada' foi a novela pola que galardoaron a británica Maggie O'Farrel, mentres que o chileno Alejandro Zambra venceu con 'Literatura infantil' e o galego Antón Riveiro, con 'Hotel Carioca'.

A resolución do xurado, composto por estudantes de diferentes institutos tanto de Galicia como de fóra da Comunidade, deuse a coñecer este mércores nunha rolda de prensa celebrada no IES Rosalía de Castro de Santiago.

En concreto, os encargados de outorgar estes premios foron alumnos de seis institutos galegos, dun madrileño e de tres centros internacionais. Deste xeito, a directora do IES Rosalía de Castro, Gemma Paredes, destacou que "non son xurados tradicionais nin críticos literarios, senón alumnos que debaten con outros mozos da súa idade sobre literatura".

No que a centros galegos se refire, os mozos son alumnos do IES Rosalía de Castro (Santiago), IES do Sar (Santiago), IES de Brión (Brión), IES Aquis Celenis (Caldas de Reis), IES Gregorio Fernández (Sarria) e o IES Universidade Laboral (Ourense). Mentres que o centro madrileño é o IES Ramiro de Maetzu.

Por outra banda, os colexios estranxeiros son o Lycée Saint Franois Xavier de Vannes (Francia), o Hockerill Anglo European College (Reino Unido) e o Grimmelsahusen Gymnasium de Gelhausen (Alemaña).

Novelas gañadoras

Durante a conferencia de prensa celebrada para anunciar aos gañadores, os voceiros dos tres xurados debullaron e defenderon as votacións das novelas galardoadas.

Respecto á novela 'Retrato de casada', destacaron a súa "linguaxe poética" e a tensión entre as súas páxinas "que anima a seguir lendo", ademais subliñaron a "forma renovadora" da escritora para redactar unha novela histórica.

De 'Literatura infantil' encomiaron a súa "universalidade temática", así como a súa narración e estilo "sinxelo". Finalmente, cualificaron 'Hotel Carioca' de "obra redonda", con xiros, distintas tramas e unha variedade temática que "merece a pena ler".

O secretario xeral de Política Lingüística, Valentín García, destacou a singularidade do premio pola natureza do xurado, composto por alumnos de Bacharelato, ao que agradeceu polo seu labor e ao que animou a seguir lendo para ser "intelectualmente invencible".

Pola súa banda, o secretario xeral técnico da Consellería de Educación, Ciencia, Universidades e FP, Manuel Vila, lembrou que varios autores que recibiron este galardón noutras edicións, posteriormente recibirían o Premio Nobel de Literatura, polo que asegurou que o San Clemente "é o primeiro paso para logralo".

Con todo, a directora do centro explicou que agora contactarán cos premiados e en base ás súas axendas concretarán unha data para celebrar a entrega, aínda que esperan que poida desenvolverse nos meses de febreiro ou marzo.