Milleiros de persoas marchan en Vigo para pedir "a reconstrución" da área sanitaria

Milleiros de persoas manifestáronse na tarde deste xoves en Vigo para pedir a "reconstrución" da área Sanitaria da cidade olívica e dotala dos recursos necesarios para conseguir unha asistencia "100 % pública e de calidade". A protesta foi convocada pola plataforma SOS Sanidade Pública.

O portavoz da plataforma SOS Sanidade Pública, Manuel González, subliñou a importancia de que os cidadáns apoien a "reconstrución" da sanidade na área de Vigo para recuperar o Álvaro Cunqueiro para o público e reforzar as estruturas de atención primaria porque son "claramente deficitarias" e iso xera "sobrecarga" nas urxencias hospitalarias. 

Ao preguntarlle sobre o "rumbo político" da manifestación ao que aludiu o presidente da Xunta, Alfonso Rueda, asegurando que detrás da convocatoria "están os de sempre", González dixo que a "política sanitaria é política" e que certos políticos tomaron decisións "equivocadas".

"Nós queremos que se faga outra política sanitaria. Afortunadamente, somos os de sempre. Reivindicamos ser os de sempre. Os que estamos sempre defendendo a sanidade pública. Sempre!. A plataforma en defensa da sanidade da área de Vigo leva máis de 30 anos defendendo a sanidade pública. Por tanto, señor Rueda, efectivamente, somos os de sempre", sentenciou o portavoz da plataforma.

Os líderes do BNG e PSdeG, presentes na manifestación

Á convocatoria asistiron, entre outros, a portavoz nacional do BNG, Ana Pontón e o secretario xeral do PSdeG, José Ramón Gómez Besteiro. Pontón asegurou que defenderá "na rúa e no Parlamento" un plan específico para dotar ao Área Sanitaria dos recursos que necesita.

"Hoxe sabemos que a pesar da pandemia, a Atención Primaria nesta área Sanitaria ten menos recursos dos que tiña. Isto é unha situación que non se pode tolerar. Hoxe nas rúas de Vigo vemos o malestar da cidadanía #ante os recortes e as privatizacións do PP, polo que o BNG vai estar aquí sempre dando a cara, man a man cos cidadáns", reivindicou Ana Pontón.

Besteiro, pola súa banda, asegurou que Vigo foi a "referencia" do PP na súa aposta por "destruír" a sanidade pública, referíndose aos 470 millóns de euros de "sobrecusto" do Cunqueiro, a pesar de construírse un hospital "máis pequeno e menos público" do previsto. 

Ademais dos líderes de BNG e PSdeG tamén acudiron á manifestación o alcalde de Vigo, Abel Caballero, o portavoz do Bloque na cidade, Xabier Pérez Igrexas, así como o subdelegado do Goberno en Pontevedra, Abel Losada, ou o delegado do Estado na Zona Franca, David Regades.