Manifestacións de taxistas en varias cidades de España contra as aseguradoras por pólizas "abusivas"

A Asociación Nacional do Taxi (ANTAXI) convocou este mércores taxistas de toda España nunha manifestación para reclamar solucións ás administracións ante as prácticas "abusivas" das aseguradoras, que "amenazan a estabilidade do sector".

O presidente de ANTAXI Julio Sanz explicou aos medios o "desamparo" que sofren algúns profesionais, aos que as aseguradoras ofrecen pólizas ou renovacións de "máis de 7000 euros ao ano". "O taxi está en perigo, as pólizas anuais son inasumibles e non permiten a continuidade do sector", afirmou.

A maior parte da protesta espérase en Madrid, onde unha caravana de taxis irá dende a sede do Ministerio de Transportes para desprazarse ata a sede do Ministerio de Economía.

En Barcelona, miles de taxis participan nunha marcha lenta dende o Aeroporto de Barcelona-El Prat con destino ás roldas de Dalt e Litoral. A mobilización, convocada pola asociación Elite Taxi baixo o nome de operación Cadeado, pretende complicar a mobilidade na área de Barcelona durante toda a mañá, xa que está previsto que acabe cara ás 14:00 horas.

Esixen medidas que protexan o taxi

Os taxistas piden ás administracións públicas que se comprometan máis cos problemas do sector e que poñan en marcha medidas que protexan o taxi "como servizo público que presta un servizo esencial aos cidadáns", como "establecer un límite para subidas das pólizas de seguros para os taxis" e eviten que os aumentos dos prezos superen o IPC anual.

Tamén solicitaron que se exclúa a sinistralidade do taxi do cálculo xeral de risco para os servizos de transporte urbano, no que, segundo explican, se inclúen os VTC, cuxa sinistralidade é moi superior. "O Goberno debe tomar cartas no asunto e garantir que os taxis aboen os conceptos propios da súa sinistralidade, pois, actualmente, métennos no mesmo saco que as VTC, e iso penalízanos inxustamente”, explicou Sanz.