O home que apareceu carbonizado nun coche en Redondela tentou queimar a vivenda familiar en novembro

Desenlace fatal para un caso do que advertían veciños de Vigo en novembro do ano pasado. O home que apareceu calcinado esta fin de semana dentro do seu coche é o mesmo que tentou prenderlle lume á vivenda en que vivían nove membros da súa familia.

O pasado 25 de novembro esta casa estivo a piques de saltar polo aire. Os veciños, todos eles membros dunha mesma familia, chamaron os bombeiros alarmados polo forte olor a gasolina.

Cando chegaron os servizos de emerxencias, atoparon unha polvoreira a piques de estoupar. A medición de gases inflamables era altísima, o lixo amoreábase, e o propietario vertera sobre o seu piso gasolina e deixou outros trinta litros dentro.

A familia amosaba entón a Televisión de Galicia a súa preocupación. "Baldearon, non sei que lle botaron porque estaba todo cheo de gasolina. E diante da policía foi cando dixo que ía acender un cigarro, e foi cando o levaron... Con gasolina e todo íao acender...", comentaba o pasado 25 de novembro un familiar.

A policía levouno directamente ao servizo de saúde mental do CHUVI. Alí recoñeceu aos axentes a súa intención de queimar a vivenda con toda a familia dentro. O home estivo ingresado na área de psiquiatría ata o luns pasado, e o sábado apareceu carbonizado no interior dun coche que ardeu nun monte de Redondela.

Confirmáronse así os temores da familia no momento da súa detención, que temían o que pasaría cando volvese á casa.

As autoridades están agora á espera da autopsia para determinar as circunstancias do seu falecemento.