Preocupación no barrio ourensán do Vinteún por unha nave insalubre ocupada por varias persoas

Unha nave propiedade do Adif, ocupada por varias persoas, trae de cabeza os veciños dun barrio de Ourense. Din que os altercados son continuos. Ademais preocúpalles a insalubridade, a zona está chea de lixo e ratas. Piden que se precinte o lugar.

Hai máis dun ano que esta nave abandonada no barrio do Vinteún de Ourense é acubillo de persoas sen fogar. Os veciños quéixanse que os altercados e os trapicheos son continuos e séntense inseguros.

O soar converteuse nun foco de infección, denuncian, con moreas de lixo por todos os lados. Nin abrir as ventás poden polo cheiro insoportable.

Os bombeiros e a policía son habituais por múltiples incidentes, houbo tres incendios recentemente e quedaron sen luz no barrio. Viven en condicións infrahumanas, piden que tomen medidas urxentes.

O Concello e a Subdelegación do Goberno en Ourense din que van manter conversas con responsables de Adif, propietaria do solar, na busca dunha solución.