Semana de Ciberliga para 1.539 escolares de cuarto de ESO en Galicia

A Garda Civil ten en marcha esta semana un concurso para divulgar o uso seguro de Internet e desta volta con novidades. Por vez primeira entran participantes de cuarto da ESO, e de Galicia.
É a fase clasificatoria no instituto público Alfredo Brañas de Carballo. Como esta, outras cincuenta desde o luns noutros tantos institutos.

 "Levamos mes e medio facendo formación e acompañamento aos centros que participan na liga e o que pretendemos é darlle forma de concurso á idea de formar os nosos rapaces en seguridade informática. Non en aspectos demasiado complexos, senón no que van empregar no día a día", explica Iván Carril, garda civil formador da Ciberliga.

Enfróntanse a retos para detectar accións de acoso, perfís falsos, información oculta, imaxes manipuladas e outros riscos da comunicación en redes sociais. É unha iniciativa da Garda Civil que implica traballo organizativo dos docentes, como a selección de participantes.

E ao final, preto dunha ducia de equipos, como o de Lucía:

"Ao escoitar a charla e todo empecei a ter máis confianza en apuntarme e coas miñas amigas apuntámonos a este reto e... con todo".

E o de Matías:

"Chamoume a atención o concurso e xuntei os amigos para pasalo ben e se cadra chegar a Madrid".

A fase final será en marzo na cidade de Aranjuez e os tres mellores equipos de Galicia competirán cos clasificados doutras oito comunidades autónomas.