Yasine Kanjaa, detido polo ataque de Alxeciras, un marroquí de 25 anos con orde de expulsión

Alxeciras espertou conmocionada tras o ataque que deixou un morto e catro feridos en dúas igrexas do centro da cidade, de 122.000 habitantes. Este mediodía unha multitude reuníase para gardar un minuto de silencio e reivindicarse como exemplo de convivencia.

O presunto autor do ataque é Yasine Kanjaa, marroquí de 25 anos. Entrou en España de maneira irregular en 2019 e desde o pasado mes de xuño tiña pendente a súa expulsión ao estar en situación irregular. A policía rexistrou esta madrugada a súa vivenda, próxima ás igrexas que atacou en pleno centro de Alxeciras. Sobre ás sete e media irrompía na de San Isidro, onde apuñalou o sacerdote salesiano Antonio Rodríguez, que nese momento celebraba misa.

A vítima, de 74 anos, está fóra de perigo tras ser intervido. Unha testemuña relataba os momentos de terror vividos no templo: "Cando viña de comungar vin o ademán, que viña a matarnos, que por Alá non nos movésemos".

Despois o atacante, vestido con xilaba negra e machado en man, dirixiuse á igrexa de Nosa Señora da Palma, onde perseguiu o sacristán, Diego Valencia, ata acabar coa súa vida. O párroco cre que el era o obxectivo da agresión: "Se eu estivese, Diego non estaría morto", lamentábase.

Kanjaa feriu outras tres persoas antes de ser detido pola policía. Estaba en situación irregular e pendente de expulsión dende xuño. Non tiña antecedentes penais nin era investigado por xihadismo. Os servizos de información marroquís colaboran con España na investigación, que a Audiencia Nacional asumiu como posible acto terrorista. A policía cre que se trata dun lobo solitario.

"É unha investigación rápida e eficaz da Policía Nacional. Non hai terceiras persoas involucradas nos feitos", aseguraba Fernando Grande-Marlaska. O ministro do Interior viaxou a Alxeciras tras cancelar a súa axenda en Estocolmo, onde se reunía cos seus homólogos europeos.