A eurocidade Chaves-Verín quere converter o río Támega no seu eixe vertebrador

Nun contexto de alerta pola seca prolongada en boa parte da Península, a eurocidade Chaves-Verín pon a vista na auga como eixo vertebrador do territorio, no que investir os recursos nos próximos anos. Concretamente no Támega, que atravesa a eurocidade e ao que queren converter nun motor económico, turístico... e nun referente ambiental.

Durante a presentación este martes do plan estratéxico ata 2030, os alcaldes de Chaves e de Verín anunciaron toda unha serie de proxectos para captar fondos centrados no aproveitamento dos recursos hídricos e na súa protección nun contexto de cambio climático.

Cada dez anos, o río Támega perde entre un dez e un quince por cento de caudal. Preservar o recurso vital da auga nun panorama xeral de escaseza e convertelo, ao mesmo tempo, nun motor económico é o que promove a eurocidade Verín-Chaves como plan estratéxico para a esta década.

"A través do río queremos firmar os dous territorios nas dimensións turísticas, económicas, ambientais, pero sempre coa auga como recurso central", di Nuno Vaz, alcalde de Chaves e presidente da Asemblea da Eurocidade.

A eurocidade abrangue un territorio de 50.000 habitantes cunha área de influencia duns 140.000. O plan estratéxico que acaban de presentar pretende captar cartos para dinamizar unha zona cada vez máis despoboada e avellentada a través de programas coma os PERTE do Goberno ou o programa Life de acción polo clima, da Unión Europea.

"Esta colleremos dez ou quince, a seguinte igual, na outra igual nada..., pero do que se trata é de que cada peza vaia sumando e non desfacendo o que fixo a anterior. A auga é un recurso fundamental para todo e iso é o que tratamos de garantir con estes proxectos", asegura Gerardo Seoane, alcalde de Verín e director executivo da Asemblea da Eurocidade.

O plan contempla desde o saneamento integral do río a unha reordenación do territorio en base ao aproveitamento dos recursos hídricos.