A reapertura do viaduto do Castro volve conectar Galicia e León pola A-6 dous anos despois do colapso

A apertura do último viaduto reconstruído no Castro, en Vega de Valdecarce (León), sentido Galicia, permitiu este luns volver conectar con normalidade Castela e León e Galicia pola A-6, unha conexión pechada desde que un dos viadutos se derrubara en xuño de 2022, durante as obras de mantemento.

O ministro de Transportes e Mobilidade Sostible, Óscar Puente, presidiu esta mañá a apertura deste último viaduto reconstruído, que completa unha intervención que contou cun investimento de 90 millóns de euros e supuxo once meses de obras na última intervención, o correspondente ao viaduto de maior tamaño.

Coa apertura ao tráfico dos tres carrís da calzada sentido A Coruña e o segundo carril da calzada sentido Madrid quedan totalmente operativos os cinco carrís do tramo da autovía situado no km 430, na contorna das localidades de Vega de Valcarce (León) e Pedrafita do Cebreiro (Lugo).

Durante o tempo que duraron os traballos, desde o derrube do verán de 2022, as conexións entre a meseta e Galicia estiveron cortadas e diminuídas por esta vía, polo que o ministro destacou que o Goberno central puxo todo da súa parte para recuperala “en tempo récord".

Deste xeito, recupérase, segundo Puente, unha conexión “vital para o país”, e que supuxo un reto “asombroso” a aplaudir, cun centenar de traballadores e unha xesta "imbatible", lembrou, destacando a enxeñería potente que fixo posible a recuperación complexa deste viaduto: “Creo que só na China se faría algo así”, apuntou.

Tras once meses de obras, recuperouse totalmente o tráfico. Aos sete fíxoo en sentido Madrid, lembrou o ministro, que estivo acompañado no acto de reapertura polo presidente da Junta de Castela e León, Alfonso Fernández Mañueco, e da Xunta de Galicia, Alfonso Rueda.

En concreto, un carril da calzada sentido Madrid púxose en servizo a finais de 2023, permitindo restituír parcialmente o tráfico, tras concluírse a construción dos viadutos pequeno e mediano.

O viaduto grande, que conta con 14 vans e 595,5 metros de lonxitude, é o que se abriu este luns completamente tras executarse nuns once meses.

“As nosas empresas de enxeñería pública son as mellores do mundo. Fomos capaces de superar unha orografía moi complexa, con muros de diques de 20 metros para cimentar as pilas. A celeridade é imbatible”, afirmou.

“A partir de hoxe volve á plena normalidade”, asegurou Óscar Puente, unha vez restablecido completamente o tráfico con dous carrís sentido Madrid e tres carrís sentido A Coruña.

Tres viadutos, 90 millóns

O proxecto para recuperar a conexión entre Castela e León e Galicia incluíu a execución de tres novos viadutos entre Vega de Valcarce e Pedrafita do Cebreiro, a través de obras de emerxencia, cun investimento que ascendeu a 90 millóns de euros (IVE incluído).

O Ministerio de Transportes e Mobilidade Sostible activou a finais de 2022 os traballos para o seu desmonte e construción tras detectar problemas estruturais durante unha inspección.

A solución que se utilizou para recuperar o viaduto é “moi robusta, con redundancia estrutural entre os vans ao ser hiperestática”, explica o informe dos técnicos. Reducíronse as xuntas ás estritamente necesarias por razóns construtivas, “asegurando unhas óptimas condicións de estanqueidade”.

Así, a impermeabilización dos taboleiros é de alta calidade, en previsión do uso de fundentes nesta zona, ao tratarse dun viaduto de alta montaña”.

Os viadutos agora en uso dispoñen do trazado e sistemas de contención “adecuados aos requirimentos do tráfico pesado actual e futuro, para o que foron deseñados con 3.000 vehículos pesados diarios e unha alta frecuencia de paso de transportes especiais cara aos portos de Galicia”.

A reconstrución dos viadutos do Castro “leva a cabo nun terreo de orografía moi complicada, que precisaron de 15 km de micropilotes de distintos diámetros e case 1,2 km de pilotes dun metro e medio de diámetro para as cimentacións de estribos e pilas dos 3 novos viadutos”.

O ministro de Transportes ratifica que a autovía Santiago-Lugo estará rematada en 2025

Así mesmo, o ministro, que destacou a grande importancia desta infraestrutura para ambas as dúas comunidades e para a vertebración de Galicia, anticipou que non será a única que se abra.

De feito, anticipou a próxima apertura, no mes de xaneiro, dos 12 quilómetros que unirán por autovía finalmente as localidades de Palas de Rei e Melide dentro da infraestrutura xeral entre Lugo e Santiago.

Tamén anunciou que antes de que finalice 2025 se abrirá o tramo de 16 quilómetros que restarían entre Melide e Arzúa. Engadiu que, en total, 

A modo de balance, salientou tamén o ministro que Galicia vai gozar o próximo ano de 50 quilómetros de estrada nova, o que supón un investimento estatal de 387 millóns de euros, entre os que se inclúen o tramo de 7,7 quilómetros inaugurado recentemente entre Vilaboa e Ermida, na A-57.

Tamén fixo referencia ás bonificacións na AP-9. Afirmou que "as galegas e os galegos van beneficiar de máis descontos nas autoestradas estatais, tanto na AP 9 xa aprobados como na AP 53, que van recibir luz verde a principios deste ano".

Compromiso coa alta velocidade entre Vigo e Porto no 2030

O ferrocarril tamén ocupa unha parte importante do orzamento previsto para Galicia, que Puente elevou ata os 483 millóns de euros anuais. A infraestruturas ferroviarias irán destinados 312 millóns, un 30% máis que en período anterior.

Destacou os traballos realizados coa alta velocidade, as novas estacións, a modernización das liñas férreas en Ourense, Vigo, Lugo e na fronteira portuguesa.