A Xunta abre unha liña de axudas de entre 3.000 e 4.600 euros para a compra de coche eléctrico

A Xunta de Galicia abrirá o 22 de xaneiro o prazo para solicitar axudas para a compra de coche eléctrico, con apoios que van desde os 3.000 aos 4.600 euros para particulares, pemes e autónomos. Estará operativo ata o 30 de setembro.

Esta nova convocatoria conta cun orzamento de 3,1 millóns de euros e subvenciona a compra de turismos e furgonetas cun custo inferior ou igual a 42.000 euros, que se amplía a 47.000 euros para vehículos eléctricos cunha autonomía maior a 30 quilómetros en modo eléctrico. Como novidade, apoiarase en 6.000 euros máis cando se trate dun vehículo adaptado para a condución de persoas con discapacidade ou se dispón de oito ou nove prazas.

A consellería de Economía, María Jesús Lorenzana, presentou este sábado en Ourense a convocatoria do programa 'Renova ou teu vehículo', acompañada de representantes da Federación de Asociacións de Concesionarios da Automoción (Faconauto). O obxectivo é renovar a idade media de 14 anos do parque móbil de Galicia.

"O diálogo constante entre a administración e as organizacións do sector é clave para afrontar os retos da electrificación e a dixitalización, así como para deseñar medidas que reforcen a nosa competitividade e, ao mesmo tempo, incentiven a demanda", asegurou a conselleira.

Será requisito imprescindible que o comprador acredite a baixa definitiva de circulación dun vehículo para achatarrar, matriculado en España, de polo menos 10 anos de antigüidade se se trata dun turismo e de cinco anos se son furgonetas

A contía das axudas oscilará entre os 3.000 e os 4.000 euros segundo os niveis de emisións. A cantidade increméntase nun 20 % para as familias numerosas, polo que os apoios poden alcanzar os 3.400 e 4.600 euros.

De tal forma, o Goberno galego achega 2.000 ou 3.000 euros, en función do modelo, e o concesionario 1.000 euros. No caso de particulares, cobre a compra dun único automóbil, e para as empresas e autónomos, ata dez unidades.

Con estes apoios prevese a renovación duns 1.400 vehículos, que mobilicen 34 millóns de euros de investimentos directos e xeren aforros enerxéticos equivalentes a 300.000 litros de gasóleo ao ano, así como económicos de 450.000 euros anuais.

Outra das novidades desta convocatoria é que se establecen novos limiares de emisións para acceder ás axudas: 100 g CO2/km e 120 g CO2/km.