Alma Pérez, medalla de prata no Campionato de Europa de taekwondo
Perdeu nunha axustada final diante da turca Zeliha Agris (8-6)
Alma Pérez, deportista do Club Boiro de Taekwondo, levou a medalla de prata nos Campionatos de Europa que se celebran en Manchester na categoría de -53 kg. Alma quedou a un paso de levar o ouro nunha final moi disputada coa turca Zeliha Agris.
A boirense dominou os dous primeiros asaltos con dúas patadas que lle permitiron colleitar unha mínima vantaxe (4-6). A súa rival reaccionou no derradeiro asalto e sumou os catro puntos que lle permitiron levar o ouro (8-6).
Alma Pérez asegurara a medalla na xornada da mañá na que conseguira meterse na final. Ao saír de cabeza de serie a deportista boirense librou da primeira rolda, impúxose nos oitavos de final á representante de Chipre 18-13 e nos cuartos á lituana 13-4, para posteriormente tombar 15-5 a representante croata.
