Louzán: "Florentino díxome que temos que resolver o dos árbitros"
Segundo o dirixente federativo, Florentino Pérez lémbralle "de cando en vez" que ten que remediar o caso Negreira
O presidente da Real Federación Española de Fútbol (RFEF), Rafael Louzán, revelou que o máximo dirixente do Real Madrid, Florentino Pérez, emprazoulle hai un ano a "resolver o asunto dos árbitros" porque estaba "a prexudicar" ao club branco e como consecuencia diso perdera " moitísimos títulos".
Louzán subliñou que Florentino Pérez é "perseverante" co tema dos colexiados e maniféstalle "con rotundidade que se sente prexudicado no ámbito arbitral", segundo deu a coñecer nunha entrevista co xornalista da Sexta Josep Pedrerol que se emitirá este xoves e da que se ofreceu un adianto.
"En Arabia hai un ano, falou comigo. Oe, tedes que resolver ese asunto dos árbitros, que nos está prexudicando moitísimo e perdemos moitísimos títulos por culpa dos árbitros", lembrou o presidente da RFEF a charla mantida en xaneiro de 2024 con motivo da celebración da Supercopa.
Louzán está á fronte da RFEF desde o pasado 16 de decembro despois de ser vicepresidente na anterior etapa e máximo responsable da federación galega de fútbol.
Segundo o dirixente federativo, Florentino Pérez lémbralle "de cando en vez" que ten que remediar o caso Negreira, no que se investiga o pago de 7,5 millóns entre 2001 e 2018 ao que fose vicepresidente do Comité Técnico de Árbitros por parte do Barcelona.
