O expresidente da Audiencia de Ourense Antonio Piña, novo xuíz da Audiencia Nacional

Segundo informa o Consello Xeral do Poder Xudicial (CXPX), Antonio Piña ocupará o posto do xubilado Manuel García Castellón á fronte do Xulgado Central de Instrución Número 6. Piña foi o presidente da Audiencia Provincial de Ourense durante dez anos.

A Comisión Permanente do CXPX declarara o pasado 20 de xuño a xubilación forzosa de García Castellón por idade, aínda que o maxistrado xa pedira adiantala antes do 16 de outubro, cando cumpriu 72 anos. Entre as causas que aínda se atopan en instrución no seu Xulgado destacan o coñecido como caso Villarejo, que vira ao redor dos negocios privados do agora comisario xubilado, ou as macrocausas de corrupción Púnica e Lezo.

Ademais, a Comisión Permanente do CXPX tamén informou de que a maxistrada Teresa Palacios obtivo a presidencia da Sección Cuarta da Sala do Penal da Audiencia Nacional, vacante pola xubilación de Ángela Murillo.

O CXPX resolveu este mércores o concurso de traslado entre membros da carreira xudicial con categoría de maxistrado 3/2024, no que se ofertaban 180 prazas, entre as que se atopan as de Piña e Palacios.