Aparece o cadáver dunha muller aboiando nunha fonte da Coruña

Un cadáver apareceu aboiando esta madrugada na fonte da praza de Salvador de Madariaga, no barrio coruñés do Ventorrillo. Foi un veciño quen o atopou ao pasar polo lugar. A Policía Nacional confirmoulle á CRTVG que se trata do corpo dunha muller de idade avanzada.

Aboiando boca abaixo, en zapatillas e vestida cun pixama. Así atopou o corpo sen vida dunha muller duns 90 anos, contra as sete da mañá, unha veciña deste barrio do Ventorrillo, que só accedeu a falar con nós por teléfono.

 "Baixei o can, coma todos os días. E achegouse á fonte porque lle gusta xogar alí e xa vin que había lago. Asusteime moito porque ao principio pensei que era un neno".

Ata o lugar desprazouse de inmediato unha patrulla da Policía Nacional para acordoar a zona e custodiar o cadáver ata que o xuíz ordene o seu levantamento. 

🔴 #AXEGAInforma de que acharon a unha muller falecida nunha fonte na Coruña.

📍 Praza Salvador de Madariaga.
➡️ No #112Galicia recibiuse a primeira información deste suceso arredor das 7:10 horas.

🔗 https://t.co/DaO76XN4nP pic.twitter.com/iMeeWTR9Ff

— 112 Galicia (@112Galicia) January 20, 2025

Urxencias Médicas alertou ao 112 do achado do corpo da muller. Ata o lugar tamén se desprazou a Policía Local e a Nacional.

Os servizos de emerxencias que se desprazaron ata o lugar confirmaron o que sinalara o primeiro alertador, sen que nada se puidese facer por salvarlle a vida á muller.

Todo apunta a que a nonaxenaria saíra da súa casa durante a noite sen que os seus se decatasen.

"Estaba en pixama e zapatillas o que fai pensar que saíu da casa sen moita lóxica".

Ao lugar achegáronse familiares da vítima, que, visiblemente afectados, estiveron arroupados polos axentes.

Pouco antes das nove e media da mañá procedeuse ao levantamento do cadáver, que foi conducido ao CHUAC para realizarlle a autopsia. 

As primeiras investigacións non apuntan a un feito violento

As primeiras investigacións non apuntan a un feito violento en relación á muller achada morta este luns na fonte dunha praza da Coruña. Así o confirmaron fontes próximas ao caso consultadas por Europa Press que sinalaron que, á espera do resultado da autopsia, non apunta "a nada delituoso nin violento".