As queimas agrícolas volven estar reactivadas desde este martes

As queimas de restos agrícolas en Galicia poden volver realizarse desde este martes, xornada na que se abre de novo a xanela para comunicar estas accións e na que xa poderán levalas a cabo aqueles particulares con permiso vixente antes de que se decretase a prohibición o pasado 21 de marzo.

Diso informou a Consellería do Medio Rural este martes a través dun comunicado no que explica que xa poden pedirse novos permisos na web habilitada e a través do teléfono 012. As persoas que pidan autorización nesta nova xanela poderán levalas a cabo a partir do xoves para cumprir coa normativa que establece un prazo de dous días entre comunicación e queima. A Xunta lembra que o permiso deixará de ter validez os días que rexistren forte vento ou altas temperaturas.