Aviso vermello no litoral por ondas de ata doce metros

Galicia manterase na influencia da profunda borrasca Herminia, centrada ao oeste de Irlanda, o cal supoñerá sucesivas liñas de inestabilidade. Segundo a previsión de MeteoGalicia, espérase unha xornada de ceos nubrados con chuvascos localmente tormentosos que poden vir acompañados de saraiba.

Galicia activou o nivel vermello nas provincias da Coruña e Pontevedra por mar combinado do noroeste con ondas de 8 a 10 metros aumentando temporalmente de 10 a 12 metros, mentres que en Lugo o aviso é laranxa (risco importante) por ventos do oeste ou suroeste de 62 a 74 km/h (forza 8), ocasionalmente de 75 a 88 km/h mar de dentro (forza 9), e ondada aumentando de 5 a 7 metros.

Así mesmo, AEMET advirte de que en Lugo e Ourense hai alerta amarela por neve que acumulará 10 centímetros en 24 horas por encima dos 1.000 metros e aviso, tamén amarelo, en toda a comunidade, salvo Ourense, por refachos de vento de ata 80km/h.

E a pesar das advertencias de afastarse das zonas costeiras, para evitar riscos innecesarios, esta mañá na Coruña, moitos saltaban o precinto que pechaba as praias.

Tamén en Muxía o vento está a bater con forza dende primeira hora da mañá. E o que aínda nos queda porque nas próximas horas a situación seguirá a ser complicada no mar, pero tamén en terra.

A cota de neve descende aos 700 metros

A cota de neve descenderá progresivmente ata os 700 metros cara á noite e as temperaturas sufrirán un lixeiro descenso. Haberá acumulacións superiores aos 10 centímetros de neve nos Ancares, A Fonsagrada e tamén en zonas altas do Courel, Terra de Trives, Valdeorras e Viana.

O vento soprará de compoñente oeste forte con refachos moi fortes e ondas por encima dos 7 metros.