Cuba libera a José Daniel Ferrer, preso político e referente da oposición
O disidente atopábase na cadea desde o 11 de xullo de 2021, cando tratou de sumarse ás protestas antigobernamentais
O líder da Unión Patriótica de Cuba, José Daniel Ferrer/EP
O preso por motivos políticos José Daniel Ferrer, referente da oposición cubana, foi liberado este xoves dentro do plan de posta en liberdade masivo anunciado pola Habana tras a decisión dos EUA de sacar a illa da lista de países que promocionan o terrorismo.
Ferrer, líder da Unión Patriótica de Cuba (UNPACU) estaba encerrado no penal de Mar Verde, no leste de Cuba. O disidente atopábase na cadea desde o 11 de xullo de 2021, cando tratou de sumarse ás protestas antigobernamentais daquela xornada, as maiores en décadas na illa.
O Goberno de Cuba anunciou o pasado martes un proceso gradual de excarceración de 553 presos. A noticia saíu pouco despois de que Washington anunciase que a cambio excluía a illa da lista terrorista. Esta última trátase dunha medida con graves consecuencias económicas e financeiras.
De momento, entre 20 e 30 reclusos considerados como presos políticos abandonaron o seu réxime de cadea.
