Desmantelada unha plantación de marihuana en pleno centro urbano de Marín

A Policía Nacional desmantelou unha plantación de marihuana que un veciño de Marín tiña no seu domicilio, co que se logrou desactivar un punto de cultivo e distribución de estupefacientes e deter ao responsable como presunto autor dun delito contra a saúde pública.

O autor dos feitos, un home de 46 anos, convertera o seu piso, un ático dun céntrico edificio da vila, nunha auténtica "factoría verde" do cultivo de plantas de marihuana, segundo a Policía Nacional.

Na comisaría de Marín recibíronse días antes da intervención unha serie de informacións sobre a posible actividade ilícita desenvolvida por este individuo, polo que os axentes iniciaron xestións de investigación.

Unha vez autorizada a de entrada e rexistro, constataron de modo fidedigno a actividade ilícita e interviñeron varias ducias de plantas de marihuana en distintos estados de desenvolvemento e floración, así como varios botes e caixas de cartón que contiñan unha cantidade destacable de cogollos de marihuana xa secos e dispostos para a súa distribución entre os consumidores finais, ademais dunha envasadora utilizada para o precintado dos cogollos.

Posteriormente procedeuse á detención do presunto autor dos feitos e ao seu posterior traslado a dependencias policiais, xunto con substancias estupefacientes e o material intervido.