Detido un adestrador de fútbol por abusar de oito menores e prometerlles contratos

A Policía Nacional detivo un adestrador de fútbol de Logroño como presunto autor de cinco delitos de corrupción de menores e outros tres de abusos sexuais por tocamentos a un mínimo de oito mozos de entre 15 e 18 anos, aos que prometía contratos deportivos.

Segundo Eduardo Esteban, xefe da Brigada Provincial de Policía Xudicial, o detido, de 38 anos, é un "presunto depredador sexual", ao que tamén se lle atribúen un delito de pornografía infantil e outros tres de acoso sexual de menores pola Internet ou child-grooming.

Esteban compareceu este mércores nunha conferencia de prensa para informar desta operación xunto á delegada do Goberno na Rioxa, Beatriz Arraiz, o xefe superior da Policía Nacional na Rioxa, Manuel Laguna; e a inspectora da Unidade de Atención á Familia e Muller (UFAM), Zita Cascallana.

A investigación iniciouse en xuño de 2022, tras recibir unha denuncia por abusos sexuais a un menor, presuntamente cometidos polo seu adestrador. Detido en agosto pasado, incautóuselle o móbil e unha tableta, en que había case 63.000 arquivos multimedia de índole sexual con menores.

Durante os dez meses que durou a investigación, que continúa aberta por uns feitos presuntamente cometidos entre 2019 e 2020, identificáronse sete vítimas máis, todas adolescentes rioxanos.

A policía non descarta a aparición de máis menores afectados, xa que o detido traballou moitos anos neste eido. O acusado facíase valer da súa posición de adestrador nun club deportivo de Logroño e observador de futbolistas para establecer relacións cos mozos, subliñou.

Ansias deportivas

Segundo dixo, aproveitábase "das ansias deportivas profesionais dos menores de chegar a ser alguén no mundo do fútbol" para manter conversas privadas "de índole sexual", fóra do ámbito dos adestramentos.

Unha vez que conseguía a súa confianza, contactaba con eles a través das redes sociais ou de aplicacións de mensaxería e, entón, pedíalles fotografías das súas partes íntimas ou citas para verse a soas e mesmo chegou a ofrecerlle diñeiro a algún a cambio de manter relacións sexuais.

Os axentes corroboraron que chegou a realizar tocamentos a algúns e tamén convenceu un para que se trasladara con el a outra cidade baixo a falsa aparencia de asinar un contrato cun equipo profesional, e alí propúxolle acudir a un hostal para manter relacións, o que o menor declinou.

Algúns dos mozos accedían aos requirimentos do adestrador polo "temor" de que, se se negaban, non poderían cumprir as súas expectativas profesionais no mundo do fútbol, agregou.

Estigmatización social

Os aparellos incautados durante a detención do adestrador, na localidade rioxana de Ventas Blancas, onde non residía, había máis de 29 xigas de arquivos multimedia.

Nestes documentos apareceron máis menores que non se puideron identificar, pero a policía sostén que, ante o medo a unha "estigmatización social", poida que non se atrevan a denunciar os feitos.

Neste sentido, a delegada do Goberno subliñou que este tipo de delitos "graves", con menores involucrados, "nunca deben quedar silenciados".

Cascallana concretou que houbo dúas denuncias, en 2015 e 2021, previas a estes feitos por "episodios semellantes", que foron arquivadas en sede xudicial, pero descoñece se sucederon no mesmo club de fútbol.

Tras a súa detención en agosto de 2022, este presunto abusador de menores pasou a disposición xudicial e foi posto en liberdade, coa obriga de comparecer no xulgado periodicamente, indicou.

Por último, Manuel Laguna puxo en valor o traballo realizado pola Brigada de Policía Xudicial e a UFAM nesta "ardua" investigación, en que tiveron que revisar eses case 63.000 arquivos, e nun tema "tan delicado", no que é "moi difícil" que as vítimas dean un paso adiante e denuncien.