Dous de cada tres nenos ucraínos están desprazados ou refuxiados

Dous de cada tres nenos ucraínos están desprazados ou refuxiados noutro país, segundo denunciou Unicef. O Fondo de Nacións Unidas para a Infancia di que a situación de sete millóns e medio de nenos é cada día máis desesperada, sobre todo no leste e no sur do país. Desde que comezou a guerra, polo menos 250 menores morreron e máis de 300 resultaron feridos. 

Di Unicef que a guerra ten rostro de neno. Unha crise humanitaria, que, coma sempre soe suceder, se ceba cos máis febles, cos máis pequenos.

Unicef calcula que máis de 15 millóns de nenos e as súas familias dentro de Ucraína necesitan axuda humanitaria. Sobre todo, as condicións están empeorando en lugares coma Mariupol. 

É a maior crise de refuxiados, din no Fondo de Nacións Unidas para a Infancia, desde a Segunda Guerra Mundial. Máis de trece millóns de desprazados.

A España chegaron xa 130.000 refuxiados ucraínos. O 38 % deles son nenos e adolescentes. Máis de 800 menores chegaron sós.