Dezaoito grandes empresas sumáronse xa á compañía mixta para impulsar as renovables

Dezaoito grandes empresas galegas sumáronse xa á compañía mixta que creou a Xunta para impulsar as enerxías renovables.

Tres de cada cinco grandes empresas galegas forman parte nestes momentos desta sociedade, superando os 20 millóns de euros de capital privado.

 Así o asegurou o presidente da Xunta, Alfonso Rueda, en resposta a unha pregunta do PSdeG.

Neste proceso superáronse "amplamente" os 20 millóns de euros que a Xunta establecera como achega inicial de capital privado para a sociedade.

O portavoz parlamentario do PSdeG, Luís Álvarez, preguntou a Rueda "cales van ser as actuacións estratéxicas do seu Goberno ata o final da lexislatura" para corrixir os "erros" das súas políticas "regresivas" que levaron a Galicia a perder 40.000 empregos industriais nos últimos 14 anos ou unhas listas de espera sanitarias "inadmisibles", entre outras cuestións.

Rueda dixo que entre as súas estratexias está a de reclamar os fondos europeos ou potenciar o "tirón" turístico que ten Galicia, así como aproveitar o "enorme potencial" de Galicia en enerxías renovables, no que destacou proceso de adhesión de empresas para a sociedade mixta.

Esta sociedade terá maioría privada aínda que o Goberno galego resérvase un "voto cualificado" co obxectivo de ter unha posición de control e poder vetar a participación en iniciativas que non sexan de interese público para Galicia.