En funcionamento o primeiro radar de tramo da Costa da Morte

O primeiro radar de tramo da Costa da Morte empezou a funcionar hai uns días e os veciños xa notan como os condutores levantan o pé do acelerador.

Está situado entre os concellos de Carballo e A Laracha, nunha vía moi coñecida por ter unha alta sinistralidade nos últimos anos. O límite de velocidade é agora de 70 quilómetros por hora, algo que para os veciños aínda é excesivo.

"Eu creo que este tramo en concreto debería ser de 50 máximo e despois un semáforo que debería de haber", opina un veciño da zona.

Esa é a outra demanda que teñen porque din poñer en xogo a vida cada vez que teñen que cruzar.

"Cando non veñen dun lado, veñen do outro e agora a estrada é moi ancha para as persoas maiores, e para os outros igual. Colleron a un rapaz aínda non fai moito aí", conta unha veciña.

Na memoria de todos os accidentes e os atropelos. "Houbo 3 mortais aí en menos de 2 anos", di un dos veciños.

A irmá de Juan foi unha das vítimas: "Ela baixara do autobús. Xa cruzara", lamenta.

"O radar ben, e se me cae unha multa tamén ben, merecida a teño. Si, si, si, si, temos que aprender", conclúe Juan.

Polo de agora, o novo radar de tramo está tendo unha moi boa acollida entre os veciños.