España, o país europeo onde máis medraron as vendas de coches no 2024
No mes de decembro as vendas incrementáronse case nun 30 %
Ata o 30 de setembro estará aberto o prazo da Xunta de Galicia para solicitar axudas para vehículos eléctricos
España é o único gran mercado dos 27 onde medraron as vendas de coches o ano pasado. En concreto, un 7,1 %, que contrasta coas caídas de Francia, Alemaña, Bélxica ou Suecia. De feito, o país nórdico rexistrou un retroceso do 7 %.
No caso galego, no 2024, rexistráronse máis de 27.000 matriculacións, o que representa un crecemento de case o 12 % en comparación co ano anterior, moi por riba tamén da media nacional.
Os eléctricos aínda non convencen completamente e mantéñense como terceira opción máis popular na Unión, mesmo tamén con caídas nas vendas de case un 6 % o ano pasado.
Axudas da Xunta para vehículos eléctricos
Desde este mércores e ata o 30 de setembro estará aberto o prazo da Xunta de Galicia para solicitar axudas para este tipo de vehículos eficientes. A contía das subvencións oscila entre os 3.000 e 4.000 euros, e para acceder a elas é imprescindible acreditar a baixa definitiva dun vehículo cunha antigüidade mínima de dez anos.
