Falece aos 75 anos Xesús Pérez Varela, conselleiro de Cultura con Manuel Fraga
Pérez Varela ocupou o cargo de conselleiro de Cultura e Comunicación Social entre os anos 1997 e 2005
O exconselleiro de Cultura da Xunta de Galicia, Xesús Pérez Varela, faleceu este xoves aos 75 anos debido a un cancro que padecía dende hai tempo.
Pérez Varela ocupou o cargo de conselleiro de Cultura e Comunicación Social entre os anos 1997 e 2005 durante a administración de Manuel Fraga. Antes diso fora deputado no Parlamento Galego polo Partido Popular de Galicia e secretario xeral de Comunicación da Xunta.
Incorporarase á Xunta en 1990 para ocupar o posto de director do Gabinete de Comunicación. Cando no ano 1997 chega á Consellería de Cultura sucede no posto a Víctor Manuel Vázquez Portomeñe, quen puxera en marcha a celebración do primeiro Ano Xacobeo en 1993. Pérez Varela tivo entón a responsabilidade de consolidar o evento nos sucesivos celebrados en 1999 e 2004.
Amais, xunto a Manuel Fraga, foi o grande impulsor da construción da Cidade da Cultura de Galicia, que iniciou as obras no ano 2001.
Natural de Redondela, antes de iniciar a súa carreira política traballara como xornalista nunha longa carreira profesional durante a que pasou por varios medios, principalmente fóra de Galicia, chegando a ser director do xornal El Imparcial.
