Ferido moi grave un motorista ao bater de fronte contra un turismo en Cenlle
A familia que viaxaba no coche, un matrimonio e tres fillos menores, saíron ilesos
Un motorista, de 68 anos e veciño de Ourense, quedou ferido moi grave nun accidente ocorrido este domingo, pasadas as oito da tarde, na travesía Barbantes Estación, no termo municipal de Cenlle.
O home conducía unha Yamaha que bateu contra un coche. No turismo viaxaba un matrimonio cos tres fillos menores. Toda a familia saíu ilesa. O subsector de Tráfico da Garda Civil de Ourense investiga as causas do sinistro.
Unha ambulancia medicalizada atendeu o ferido no lugar do accidente e logo trasladouno ao complexo hospitalario de Ourense (CHUO), onde quedou ingresado.
Colectivo vulnerable
A DXT lembra que o colectivo de motoristas é un dos máis vulnerables. Segundo un estudo do Consello Europeo de Seguridade viaria, por cada quilómetro que percorren nunha estrada da UE, o risco de perder a vida, en comparación cun condutor de automóbil, é 20 veces maior.
As motocicletas e os ciclomotores representan o 15 % do parque de vehículos e os seus usuarios, o 22 % das persoas falecidas en accidentes de tráfico.
