Gonzalo Caballero: "Estou con forzas, con ganas, e teño vontade de mellorar Galicia"

Gonzalo Caballero, exsecretario xeral do PSdG e candidato á Xunta nas eleccións de 2020,  advirte do risco de que o partido caia na irrelevancia.

Nunha entrevista na Radio Galega, e a unhas horas de que arranque o proceso de primarias, Caballero fai un chamamento aos dirixentes socialistas para rectificar o rumbo e abrir unha nova etapa.

"Se se dan esas condicións estou disposto a ocupar un primeiro nivel de actividade política pero, en caso contrario, non quero ser cómplice do desastre electoral"

Caballero asegura que  hai unha "fonda preocupación na militancia" ante a perda de apoio electoral na etapa "protagonizada por Formoso e por Besteiro".

"É evidente a estas alturas que as indicacións de Pedro Sánchez e dos baróns localistas en Galicia non acertaron á hora de apostar por Formoso e Besteiro á fronte do partido e como candidato nas últimas eleccións", asegura.

O exdirixente do PSdG saca peito do seu legado á fronte do partido entre 2017 e 2021 cando  "creceu en tódalas eleccións, gañoulle ó PP nas xerais e nas europeas e conseguiu o maior nivel de representación municipal e nas Cortes Xerais".

Agora, engade, cómpre remontar de novo para frear ó PP e ó BNG e para que "haxa posibilidade de alternancia".

Non conforme coa decisión sobre os avais

Gonzalo Caballero di non apoiar a decisión do PSOE de duplicar o número de avais necesarios para concorrer ás primarias.

Con todo, explica, no seu caso non é un problema. Di contar con apoios suficientes,  especialmente nas provincias do sur.

"O problema non é presentar avais ou gañar as primarias, senón sacar o PSdG desta etapa de letargo", di.

O exdirixente socialista di tender a man e "estar con forzas, ganas e vontade de mellorar Galicia ante a inercia das políticas conservadoras".