O exedil de Santiago Carlos Nieves morre mentres se bañaba nunha praia do Grove
Malia os esforzos por salvarlle a vida, os profesionais sanitarios só puideron confirmar o seu falecemento
Carlos Nieves, concelleiro socialista do Concello de Santiago desde 1987 ata 2011, con algunhas interrupcións, faleceu este sábado mentres se bañaba na praia de Seixeliño, no municipio pontevedrés do Grove.
Imaxe de arquivo de Carlos Nieves
O suceso ocorreu contra as 14:00 horas, na zona de baño entre as praias de Area da Cruz e Seixeliño.
O 112 Galicia tivo constancia a través de Urxencias Sanitarias de Galicia-061, que estaba a mobilizar o seu persoal a bordo do helicóptero medicalizado con base en Santiago.
Os servixos sanitarios acababan de rescatar un home que aboiaba boca abaixo na auga e estaban a tratar de reanimalo na area.
De inmediato, activouse un operativo no que, ademais dos servizos sanitarios, participaron a Garda Civil, a Policía Local e o GES do Grove.
Malia os esforzos por salvarlle a vida, os profesionais sanitarios só puideron confirmar o seu falecemento.
