Outra carta bomba nunha fábrica de armas de Zaragoza

A empresa de fabricación de armamento zaragozana Instalaza recibiu na tarde deste mércores unha carta de características semellantes á que estourou esta mañá na embaixada de Ucraína en Madrid.

Segundo explican fontes da Policía Nacional, os TEDAX detonaron de forma controlada o artefacto, sen que haxa que lamentar feridos.

Os especialistas están a recoller vestixios do paquete bomba para poder analizalos e determinar así que contiña o sobre exactamente.

Instalaza é unha empresa de armamento que emprega máis de 150 persoas en tres factorías situadas en Zaragoza e que exporta a súa produción a máis de 35 países.

A empresa fabrica en Zaragoza sistemas lanzafoguetes, granadas de man e dispositivos de visión nocturna.

Este mércores ao mediodía quedou ferido un empregado da embaixada Ucraína en Madrid ao recoller un sobre postal que contiña un pequeno explosivo de fabricación caseira.