Pecha unha praia de Sanxenxo por unha vertedura e recomendan non bañarse noutra de Vilagarcía
A praia de Lavapanos foi pechada ao baño debido a uns residuos liberados pola obstrución dun cano
A praia do Preguntoiro deu niveis altos de E. coli nunha análise das augas
Imaxe de arquivo da praia de Lavapanos, en Sanxenxo (Turismo de Galicia)
Os concellos de Sanxenxo e Vilagarcía, na provincia de Pontevedra, informaron este venres de incidencias en dúas praias, concretamente o peche dunha no primeiro concello por unha vertedura e a recomendación de non bañarse nun areal de Vilaxoán por niveis altos de E. coli.
En concreto, en Sanxenxo, a obstrución dun cano na Rúa Madrid, á altura da praia de Lavapanos, provocou unha vertedura na praia. Aínda que a concesionaria xa atopou e arranxou a avaría, pechouse ao baño a praia por precaución.
Por outra banda, o Concello de Vilagarcía recibiu a última hora deste venres os resultados das análises feitas á auga da Praia do Preguntoiro, que deu niveis altos de escherichia coli, por encima dos permitidos. Así, e aínda que os niveis de enterococos está nos límites permitidos, recoméndase absterse de bañarse.
Imaxe de arquivo da praia do Preguntoiro, en Vilagarcía de Arousa (Turismo de Galicia)
Neste último caso, o Concello criticou a "xestión da información" por parte da Consellería de Sanidade, xa que "sabían os resultados desde onte". "Non parece moi normal que se unha análise se fai o martes 6 e os resultados coñécense o xoves 8, como se admite no propio escrito da consellería, esperen ata o venres 9 a última hora da mañá para comunicalo ao Concello", dixo o Goberno local.
