Pesca advirte de que o veto de Bruxelas ao arrastre é unha noticia "devastadora" para a frota
A Consellería insiste en que non hai informes técnicos que avalen a decisión de Bruxelas
Esta semana fíxose oficial o veto de Bruxelas á pesca de arrastre. A Consellería de Pesca insiste en que é unha medida devastadora e arbitraria, que non conta con informes técnicos que a avalen.
O director xeral de Pesca, Antonio Basanta, asegura que a decisión "é unha falta de respecto cara ao sector, creo que é un paso máis na deriva ambientalista que non ten en conta criterio socioeconómico desta actividade. Recoñecendo que non teñen datos concluentes fan unha proposta devastadora para a nosa frota".
Escoitar as propostas dos bateeiros para paliar a escaseza de mexilla
O director xeral de Pesca tamén falou do conflito aberto pola escaseza de mexilla. Di que a consellería está aberta ás propostas dos afectados. Responde así ás protestas dos bateeiros, que se manifestaron ante a Xunta para esixir solucións, e lembra que xa se acordou a ampliación duns 130 quilómetros de superficie para extraer semente do mexillón.
"A consellería é consciente de que existe un problema de escaseza de mexilla, que se vén analizando nos últimos meses, e de aí saen medidas a medio, curto e longo prazo. Estamos abertos a recoller as propostas que teñen as organizacións", asegura Antonio Basanta.
